Brätlen ir Nöchi vor Neuegg - Oberbaumen

Mi het Mittwuch, dr 7. Juni 2017 gschriebe u für einisch üse Stamm vom Schützehuus Burgdorf churzerhand a ne Waudrand i d’Nöchi vor Neuegg-Oberbaumen bi Affoltern i/E. verleit. Unger kundiger Füherig vom Toni u der Lilo K. u dr tatchräftige Ungerstützig vom Erwin J. hei diä drü bir Füürschteu Oberbaume ideali Verhäutnis für näs gmüetlechs Brätle gschaffe. Aune Drüne äs härzlichs Dankeschön! Oben use!!!

U si si choh die GCEler/inne mit riichlech Fleisch oder Gwurschtetem, mit farbigem Gmües, mit ungerschiedlicher Tranksame, feinem, säuber gmachtem Gebäck u viu, viu gueter Lune. 

Mi het sech troffe, unändlich viu gschwaflet, verbessert u besser gwüsst, de gly ä mau übertaa, enang zueproschtet u dä windig, aber wunderschön Abe mit em rötlich belüchtete Aupekamm vom Säntis bis zum Montblanc bestuunet - äs isch üs fasch ä chli chaut über e Rügge abgloffe, wo mir schoh fasch wehmühetig feschtgschteut hei, dass mir haut doch ir schönschte Gägend ir Schwitz dörfe wohne!

U jtz non ä spezieue Hiwys uf Erwins unbändige, bsungere Erfindergeischt. Luegit guet uf das 11. Biudli mit em Drübei-Hochgrillgrät. Wenn Dir nech fescht, fescht Müeh gät u mit Adlerouge chönntit luege, würdit Dir uf em Techu dr Mercedes Drüstärn erkenne. Di beide Chemi si di beide Ii- u Usgangsrohr vom ene verroschtete Uspufftopf – ganz eifach nach ufeboge. Dr Topf isch waagrächt ufgschnitte, mit zwöine Scharnier verseh u emenä ufgschweisste Dröhtli aus Handhäbi usgformet – eifach geniau!!!

U non äs Letschts: „Wär nid isch drbi gsi – het viu verpasst“!!!